Kryeministri i Kosovës, Avdullah Hoti, në kuadër të vizitës zyrtare në Bruksel, është pritur sot në selinë e NATO-s nga sekretari i Përgjithshëm, Jens Stoltenberg, me të cilin ka biseduar për zhvillimet politike dhe ato të sigurisë në vendin tonë.

Me këtë rast, kryeministri Hoti shprehu falënderimin e tij dhe të popullit të Kosovës për misionin e KFOR-it në Kosovë, duke theksuar se prania e NATO-s është e një rëndësie të veçantë për forcimin e paqes dhe të stabilitetit në këtë pjesë të Evropës Juglindore.

Hoti e ka falënderuar Stoltenbergun edhe për ndihmën që u ka dhënë KFOR-i institucioneve të Kosovës për menaxhimin e pandemisë COVID-19.

Duke e vlerësuar rolin e Aleancës veri-atlantike për paqen dhe stabilitetin ndërkombëtar, kryeministri Hoti theksoi përkushtimin e Kosovës për ndërtimin e një të ardhmeje euroatlantike dhe synimin që Kosova sa më parë të bëhet anëtare e NATO-s.

Ndërsa, sekretari i përgjithshëm Stoltenberg tha se NATO-ja do të ofrojë edhe më tej përkrahje të gjithanshme për Kosovën, për të siguruar një mjedis paqësor dhe një të ardhme të sigurt për të gjithë qytetarët e saj.

Në fund të këtij takimi, kryeministri Hoti e ftoi sekretarin Stoltenberg të vizitojë Kosovën, sa më parë që t’i jepet rasti. /Gazeta Sinjali/