Kryetari i Aleancës për Ardhmërinë e Kosovës, Ramush Haradinaj, ka thënë se nëse ai zgjedhet president, gjatë mandatit të tij, Forcat e Sigurisë së Kosovës do të bëhen pjesë e NATO-s, shkruan Gazeta Sinjali.

Sipas Haradinajt, anëtarësimi i Kosovës në NATO është çelës i sigurisë dhe i paqes në rajon, si dhe përgjigjja më e mirë në deklaratën luftënxitëse të presidentit serb, Aleksandar Vuçiq.

“Fqinji ynë agresiv po u kthehet kërcënimeve të tij të zakonshme kundër Shtetit tonë! Ai ndihet i fortë tani kur Kosova ka një qeveri të shkarkuar dhe një President të dobët në detyrë. Ne kemi nevojë për një president i cili qëndron fortë për Kosovën dhe është i denjë të përballet me kundërshtarin agresiv, Serbinë. Ndërsa e krijuam ushtrinë në kohën sa isha kryeministër, një punë që ishte kundër bindjes së fqinjit tonë, në mandatin tim si president, Kosova do të bëhet pjesë e NATO-s”, ka shkruar Haradinaj në Facebook./Gazeta Sinjali/