Është arrestuar një i dyshuar në Suharekë pasi kishte shkrepur me armë gjatë muajit tetor të vitit 2020, shkruan Gazeta Sinjali.

Pas një pune operative hetuesit e policisë në stacionin policor në Suharekë, duke zhvilluar hetime për një informacion nga muaji tetor i vitit 2020, ku thuhet se i njëjti kishte gjuajtur me armë zjarri në fshatin Krushicë e Poshtme në Suharekë, hetuesit kanë arritur që të gjejnë dhe sekuestrojnë armën nga e cila dyshohet se është shkrepur pa leje.

Hetuesit fillimisht kishin kryer një urdhër kontrolle në shtëpinë e personit të dyshuar por të njëjtit kanë refuzuar të dorëzojnë armën në momentin e gjuajtjes duke ju fshehur organit të policisë, por pas sekuestrimit dhe administrimit të provave nga njësiti i forenzikës përmes një DVR të kamerave të shtëpisë së të dyshuarit policia ka gjetur incizimin ku i dyshuari A.K i lindur në vitin 1980 shihet duke gjuajtur me armë.

Pas kësaj policia sot më datë 03 shkurt 2021, përsëri është paraqitur te shtëpia e të dyshuarit në fshatin Krushicë e Poshtme dhe ka kërkuar që arma të dorëzohet, ku i dyshuari ka pranuar se e posedon armën. Në lidhje me këtë policia ka sekuestruar një pushkë automatike AK47 dhe një karikator të kësaj pushke.

Pas intervistimit të personit të dyshimtë, i njëjti me aktvendim të prokurorit dërgohet në ndalim prej 48 orë. /Gazeta Sinjali/