Gjermania ka mbledhur prova të krimeve të luftës në Ukrainë, tha prokurori i përgjithshëm i vendit në një intervistë për gazetën e botuar të shtunën, duke shtuar se ai sheh nevojën për një proces gjyqësor në nivel ndërkombëtar.
“Aktualisht, për shembull, ne jemi duke u fokusuar në vrasjet masive në Bucha ose sulmet kundër infrastrukturës civile ukrainase,” tha Peter Frank për gazetën Welt am Sonntag.
Deri më tani, prokurorët kishin prova në “rangun treshifror”, shtoi ai, pa dhënë detaje.
Reuters gjithashtu raportoi se Ukraina dhe aleatët e saj perëndimorë kanë akuzuar forcat ruse për kryerjen e mizorive në Bucha, një qytet satelit i Kievit, menjëherë pas nisjes së pushtimit të tyre shkurtin e kaluar. Moska e ka mohuar akuzën. Rusia ka shënjestruar gjithashtu infrastrukturën kryesore në Ukrainë, por mohon të ketë shënjestruar qëllimisht civilët.
Gjermania filloi mbledhjen e provave në mars 2022 për të ndjekur penalisht krimet e mundshme të luftës, duke përfshirë intervistimin e refugjatëve ukrainas dhe vlerësimin e informacionit të disponueshëm publikisht, tha Frank, duke shtuar se prokurorët gjermanë nuk po hetonin ende individë të veçantë.
“Ne po përgatitemi për një çështje të mundshme gjyqësore të mëvonshme – qoftë me ne në Gjermani, qoftë me partnerët tanë të huaj, qoftë para një gjykate ndërkombëtare”, deklaroi Frank.
I pyetur se kush duhet të gjykohet, Frank tha se udhëheqësit e shtetit rus dhe ata që zbatojnë vendimet në nivelin më të lartë ushtarak duhet të mbajnë përgjegjësi.
Ukraina po bën presion për krijimin e një gjykate speciale për të ndjekur penalisht liderët ushtarakë dhe politikë rusë që ajo i konsideron përgjegjës për fillimin e luftës.
