Udhëheqësi i Komitetit për Marrëdhënie me Jashtë në Dhomën e Përfaqësuesëve në Shtetet e Bashkuara të Amerikës, Eliot Engel, përsëri ka thënë se Kosova është shtet i pavarur dhe se ky është një realitet i pakthyeshëm, shkruan Gazeta Sinjali.
Engel gjatë fjalimit të tij sot në Komitet, u shpreh se Serbia duhet ta pranojë këtë realitet dhe të ecë para, pasi sipas tij, me tentimin për të bllokuar njohjen e Kosovës e bllokon vetëm veten.
Ai po ashtu në fjalimin hapës ka folur për situatën në Ballkanin Perëndimor dhe ka udhëzuar se si duhet të veprojë tutje administrate e re amerikane në Ballkan.
Engel ka thënë se asnjë vend nuk ia ka prekur më tepër zemrën sesa Kosova.
Ai ka thënë se është krenar që lidershipi amerikan me aleatët e NATO-s ka ndaluar gjenocidin në një shtet në Evropë.
“Kosova është një shtet i pavarur dhe është tash e më tepër se një dekadë. Nëse e kthen kohën tri dekada prapa, kjo mund të duket si një ëndërr. Por sot Kosova i është bashkuar Bankës Botërore, IMF-së dhe më tepër se 110 shtete e kanë njohur pavarësinë e saj, përfshirë SHBA-ja, Britania, Franca, Gjermania, Japonia dhe shumë shtete tjera të rëndësishme. Kosovarët po tregojnë talentin e tyre, ku ka këngëtarë me famë botërore e futbollistë. Po ashtu në vendin ku jetoj në New York ka pronarë të patundshmërive dhe restoranteve. Por mbesin sfida serioze”.
“Më e rëndësishme, është koha për Serbinë të ecë para. Kosova është e pavarur, kjo nuk do të kthehet prapa. Duke bllokuar njohjen e Kosovës dhe anëtarësimin e saj në OKB e organizata tjera, Serbia në fakt e bllokon veten. Pasi kërkesa për t’iu bashkuar BE-së nuk do të aprovohet pa e njohur Kosovën”, deklaroi Engel.
Ai ka folur edhe për krimet e luftës në Kosovë, e po ashtu e ka quajtur të padrejtë Gjykatën Speciale, duke thënë se momentalisht po gjykon vetëm shqiptarët, po bën gjykime në baza etnike.
Ai ka thënë se Serbia ka kryer shumicën e krimeve të luftës në Kosovë dhe se ajo nuk po i dënon kriminelët e nuk po ka as presion nga ndërkombëtarët. Ndërkohë Kosovës, si viktimë, i është bërë presion për themelimin e një Gjykate Speciale për të hetuar krimet e luftës.
Engel theksoi se të gjithë që kanë kryer krime duhet të dënohen, por se kjo gjykatë hibride me gjyqtarë ndërkombëtarë, duket se po bën selektime vetëm në baza etnike.
Ai e ka quajtur Gjykatën Speciale si pjesë e problemit më të gjerë se si SHBA-ja i është qasur Kosovës. Ai ka thënë se SHBA-ja nuk e ka parë Kosovën si partner të vërtetë sovran, e si shtet të rregullt me të cilin ka marrëdhënie normale bilaterale.
Engel u shpreh se madje janë limituar edhe zgjedhjet sovrane të Kosovës për të evituar ofendimet e Beogradit.
“Për fat të keq me veprimet e administratës Trump kemi kontribuuar në rrëzimin e Qeverisë së Kosovës jo shumë kohë më parë. I kemi thënë Kosovës se nuk mund të aplikojë bazën e reciprocitetin në tregti me Serbinë, që është parim themelor. Madje vendosëm edhe frena në ushtrinë mbrojtëse të vogël të Kosovës. Këto gjëra duhet të ndalin. E shpresoj që administrate e re e zgjedhur Biden të rregullojë këtë”, përfundoi Engel.
