Një 20-vjeçar ka përfunduar në prangat e Policisë së Kosovës, më shumë se një javë pas një rasti të dhunës ndaj një të mituri në Pejë, raporton Sinjali.
Sinjali mëson ekskluzivisht se i arrestuari është Ermal Manaj, 20 vjeçari, i cili dyshohet për veprat penale “Lëndim i lehtë trupor” dhe “Mbajtje në pronësi, kontroll ose posedim të paautorizuar të armëve”.
Sipas burimeve të Sinjalit, rasti kishte ndodhur më 8 korrik në rrugën “Madeleine Albright” në Pejë, ku viktimë ishte një i mitur, T. D, 17 vjeçar.
Pas veprimeve hetimore, më 16 korrik, Policia ka arritur ta arrestojë të dyshuarin.
Gjatë paraqitjes në Sektorin e Hetimeve, Ermal Manaj ka dorëzuar edhe një pistoletë metalike shkrepëse, për të cilën ka deklaruar se është arma që kishte përdorur gjatë incidentit.
I dyshuari është intervistuar në prani të avokatit mbrojtës, ndërsa me aktvendim të Prokurorit të Shtetit i është caktuar masa e ndalimit policor prej 48 orësh.
Rasti mbetet nën hetim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
