image Drejtori i Trafikut Urban befason me deklaratën për përdorimin e dorëzave në autobus

Kosovë

Masat/ Drejtori i Trafikut Urban befason me deklaratën për përdorimin e dorëzave në autobus

news image

Drejtori i Trafikut Urban, Lulzim Rexhepaj tha se gjatë ditës së sotme do të ketë më shumë kontrolle nëpër autobusë dhe shpreson se nuk do të hasin në vështirësi.

“Sot e kemi përforcuar edhe kontrollin që tu vijmë në ndihmë edhe shoferit e kondukterit. Do të mundohemi që të mos i  lejojmë qytetarët të hyjnë pa maska në autobus dhe t’i japim mbështje stafit të autobusit. Në rast se nuk do të ja dalim ne, do të kërkojmë edhe ndihmën e policisë. Por, besoj se nuk do të kemi më raste, sot jemi optimistë që të ecë mbarë”, tha Rexhepaj.

Rexhepaj tha se maskat janë obligative për udhëtarët që duan të udhëtojnë me trafikun urban, ndërsa dorëzat jo.

“Maskat i kemi bërë obligative, kurse dorëzat mund edhe të mos përdoren për shkak se kemi vendosur dezinfektues në hyrje të autobusit. Është normative edhe dorëzat, por nëse nuk ju kanë qëlluar, nuk do të bëhet problem. Gjithashtu maska duhet të mbuloj hyndën dhe gojën”, tha drejtori i Trafikut Urban.

Ai shtoi se gjatë ditës së djeshme kanë hasur vështirësi në dy linja, pasi udhëtarët nuk i kanë respektuar rregullat.

“Patëm dy raste në linjën 1 dhe 3, disa udhëtarë të pasjellshëm, nëse mund t’i quajmë ashtu, kishin tentuar të hyjnë në autobus pa maska dhe duke mos respektuar për të mos hyrë në autobus pasi janë mbushur vendet, sepse është numri i kufizuar pra vetëm 20 persona mund të hyjnë në autobus, pastaj mbyllet dera dhe udhëtarët duhet të presin autobusin tjetër”, tha Rexhepaj në RTV Dukagjini.

Ai u bëri thirrje qytetarëve që të respketojnë masat, të respektojnë edhe shenjat kur stafi i autobusit të jep shenjë që është përmbushur numri i caktuar i udhëtarëve dhe tha se çdo natë autobusët dezinfektohen dhe pastrohen./Gazeta Sinjali/