Kryetari i Kuvendit të Serbisë Ivica Daçiq, u shpreh se është reale të pritet që Bashkimi Evropian dhe Shtetet e Bashkuara të Amerikës do të veprojnë së bashku në Ballkanin Perëndimor pasi që sipas tij ka ndyshuar çasja e tyre, transmeton Gazeta Sinjali.

Këto deklarata të Daçiq vijnë pas vizitës së paralajmëruar në Beograd dhe Prishtinë të ndërmjetësit evropian në dialogun Kosovë – Serbi dhe zëvendës sekretarit të SHBA-së, Matthew Palmer.

Daçiq tha se pret presion të ashpër në lidhje me çështjen e Kosovës, por që vuri në dukje se situata në terren është e ndryshme tashmë dhe se Serbia nuk është në situatën që “vetëm të dëgjojë dhe të shoh se si reagojnë fuqitë e mëdha”.

“Presioni do të rritet, por gjithçka varet nga udhëheqja politike që është në Beograd dhe ne nuk do të pranojmë të shantazhohemi. Nëse dikush planifikon të sjellë një ‘non – paper’ në Serbi, le të mos humbasin kohë”, tha Daçiq.

Ai vuri në dukje qëndrimin e përsëritur të Presidentit të Serbisë, Aleksandar Vuçiq, se Serbia dëshiron kompromis dhe marrëveshje, por nuk pranon kurrfarë shantazhe që do të nënkuptonte njohjen e Kosovës.

“Ne gjithmonë kemi qenë për dialog, nuk kemi qenë kurrë në favor të nënshkrimit të diçkaje, e që pastaj të mos e zbatojmë, siç ka bërë Prishtina. Do të ketë presion të rëndë, por nëse dikush dëshiron marrëdhënie korrekte, ne jemi këtu”, tha Daçiq.

I pyetur nëse ‘non paper’ mund të jetë rezultat i vizitave të paralajmëruara të Lajçakut dhe Palmer-it, Daçiq tha se ato vizita mund të arsyetohen me zgjedhjet që u zhvilluan në Kosovë dhe për të parë se si do të jetë situata kur bëhet fjalë për vazhdimin e dialogut, por që më shumë se kaq nuk mund të pritet sepse, siç tha ai, qeveria e Kosovës nuk është formuar ende.

“Ajo qeveri do të jetë shumë ekstreme, ata refuzuan çdo dialog, nuk është asgjë optimiste tani në kuptimin se pala shqiptare është e pafajshme dhe se dikush e sheh fajtorin tek ne, kjo nuk është më ashtu”, tha Daçiq./Gazeta Sinjali/