Institucioni më i lartë i sigurisë në vend, Agjencia e Kosovës për Inteligjencë prej dje ka mbetur pa drejtuesin e saj.

Kjo pasi,  shefi  i  deritashëm i këtij institucioni, Shpend Maxhuni dha dorëheqje duke e lënë në gjysmë mandatin e tij 5 vjeçar.  

Ai ia paraqiti kryeministrit në largim aktin e dorëheqjes pas mbi një vit e gjysmë të emërimit në këtë detyrë ndërsa arsyet nuk janë bërë të ditura nga Shpend Maxhuni i cili prej dje ka qenë i paqasshëm në telefon.

Por, cilat janë procedurat legjislative që duhet të ndiqen rastet kur pozita e kryespiunit të Kosovës mbetet vakante?

Sipas Ligjit për Agjencinë e Kosovës për Inteligjencë, në rastet si kjo e fundit, pozita e drejtorit të AKI-së duhet të plotësohet brenda 20 ditësh. Shefi i AKI-së ndonëse sipas ligjit i përgjigjet drejtpërdrejt kryeministrit të Republikës së Kosovës, ai nuk mund ta emërojë vetë drejtuesin e këtij institucioni pa pëlqimin e Presidentit.

 “Presidenti i Republikës së Kosovës së bashku me Kryeministrin, emërojnë së bashku Drejtorin e AKI brenda njëzet (20) ditësh pune nga dita kur pozita mbetet e lirë”, thuhet në Ligjin për AKI-në, shkruan Gazeta Sinjali.

Ligji poashtu specifikon se drejtori i AKI-së emërohet për një mandat pesë (5) vjeçar, i cili mund të vazhdohet edhe njëherë.

Në ligj nuk specifikohet nëse deri në zgjedhjet e drejtorit të ri kush mund të ushtrojë detyrën e shefit të AKI-së por theksohet se në kryerjen e përgjegjësive të veta, drejtori i AKI-së ndihmohet nga një zëvendësdrejtor, udhëheqësit e njësive organizative, këshilltarët, dhe personeli me kualifikim të duhur sipas  nevojës, në pajtueshmëri me rregullat dhe procedurat e parashtruara me këtë Ligj dhe Rregulloren e Organizimit të Brendshëm.

Mbetet e paqartë nëse, shefi i ri i AKI-së do të emërohet nga kryeministri në largim i Kosovës, Ramush Haradinaj së bashku me presidnetin Hashim Thaçi apo nëse ky person do të zgjidhet nga Qeveria e ardhshme e cila pritet të drejtohet nga Albin Kurti.

Ky i fundit sa ishte në opozitë kishte kritikuar ashpër Shpend Maxhunin si njeri të Hashim Thaçit duke e bërë përgjegjës për një mori skandalesh që ka ndodhur në fushën e sigurisë. Kjo mbase mund të jetë edhe njëra prej arsyeve kryesore që Shpend Maxhuni nuk e priti fare formimin e qeverisë së re duke dhënë dorëheqje nga pozita e tij. /Gazeta Sinjali/