Kosova insiston se diskutimet me Serbinë tani kanë afat të caktuar. Zëvendëskryeministri Besnik Bislimi gjatë raportimit në Komisionin për Punë të Jashtme tha se marsi i vitit 2023 është afati i caktuar për marrëveshjen finale Kosovë-Serbi.
Në tekstin e marrëveshjes së 23 nëntorit të arritur në Bruksel nuk shënohet ndonjë datë si afat për përmbylljen e bisedimeve, por Bislimi thotë se për këtë çështje, një shkresë shtesë atë natë e morën nga emisari i BE-së për dialogun, Miroslav Lajçak.
“Kërkesa ka qenë që diskutimet të kufizohen në kohë, në mënyrë që ato të mos zgjaten pastaj pa kufi dhe mendoj se me dakordimin e datës 23 nëntor e kemi arrtur këtë, për arsye se si pjesë e marrëveshjes është paraparë që bisedimet për propozimin franko-gjerman duhet të kufizohen deri në fund të marsit”, tha Bislimi.
“Në fakt, në tekst nuk figuron data mars, mirëpo figuron takimi i grupit special për normalizim dhe pastaj ne e kemi pranuar këtë formulim vetëm në këmbim të një shkrese shtesë të z. Lajçak, ku ai e cakton afatin për normalizim, marsin 2023. Do të thotë ne e kemi marrë këtë siguri, e pastaj e kemi pranuar atë formulim”, shtoi zëvendëskryeministri.
