Gjashtëmbëdhjetë fëmijë u shpëtuan nga një shtëpi e rrënuar në një zonë rurale të shtetit të Ohajos, pasi ishin mbajtur të izoluar në vetëm një dhomë, në kushte “të mjerueshme”, për pjesën më të madhe të katër viteve të fundit, njoftuan autoritetet të mërkurën.
Fëmijët, të cilët zyrtarët thanë se i përkisnin së njëjtës familje dhe jetonin në kushte të rënda papastërtie, të rrethuar nga mbeturina dhe jashtëqitje njerëzore, ishin të moshës nga një vjeç e gjysmë deri në 18 vjeç dhe përfshinin si djem, ashtu edhe vajza. Disa prej tyre nuk ishin në gjendje të flisnin, ndërsa njëra prej tyre – një 18-vjeçare me aftësi të kufizuara në zhvillim – nuk dinte as ta shkruante emrin e saj.
“Shumicën e bagëtive tona i kemi mbajtur në kushte më të mira se këta fëmijë”, tha në një konferencë për media sherifi i qarkut Vinton, Ryan Cain, duke përshkruar ambientin si një vend me prani të lartë bakteresh dhe jashtëqitjesh njerëzore.
“Ishte thjesht një skenë e neveritshme”, shtoi ai, shkruan The Guardian, përcjell Sinjali.
Prindërit e fëmijëve dhe dy gjyshërit e tyre janë akuzuar secili për nga 16 vepra penale të rrezikimit të fëmijëve të shkallës së dytë, pasi rasti përfshin “dëmtime të rënda fizike”, tha prokurori i qarkut Vinton, William Archer. Ai theksoi se nuk bëhet fjalë për trafikim njerëzor, por për “një situatë brenda familjes”.
Autoritetet i zbuluan fëmijët gjatë ekzekutimit të një urdhri kontrolli në kuadër të një hetimi tjetër, të palidhur me këtë rast, tha prokurori i përgjithshëm i Ohajos, Andy Wilson.
“Nuk e dinim se aty ndodheshin 16 fëmijë”, tha Wilson, i cili e përshkroi atë që pa në shtëpinë në fshatin e vogël Hamden – i vendosur në një nga qarqet më të varfra të Ohajos – si “e keqe e pastër”.
Skena “e tmerrshme”, sipas tij, ishte më e rënda me të cilën është përballur gjatë gjithë karrierës së tij.
“Është diçka që nuk jemi mësuar ta shohim këtu në Amerikë”, tha Wilson, duke shtuar se edhe pas gati 24 orësh “ende nuk mund ta heq erën nga trupi”.
Sherifi tha se duket se fëmijët e kalonin pjesën më të madhe të kohës në një dhomë me përmasa rreth 3.6 me 3.6 metra. Ai nuk bëri të ditur se si mbaheshin brenda shtëpisë, por theksoi se autoritetet nuk gjetën kafaze.
Shtatë prej fëmijëve u dërguan në spitale në Columbus, ndërsa dy të tjerë u transportuan me helikopter në qendra traumatologjike të nivelit të parë. Një nga fëmijët ndodhej në gjendje kritike të martën dhe iu desh të intubohej, tha Wilson.
“Ata dukeshin pothuajse si kafshë të egra”, tha ai. “Ishte e tmerrshme.”
Gary Siders Jr., Gary Siders Sr., Christina Siders dhe Elizabeth Siders dolën të mërkurën para gjykatës, ku gjyqtari deklaroi në emër të tyre se nuk e pranonin fajësinë dhe caktoi një garanci prej 300 mijë dollarësh për secilin.
Hetuesit thanë se anëtarët e familjes kishin lëvizur nëpër jugun e Ohajos gjatë dy dekadave të fundit dhe se duket se kishin shmangur regjistrimin në sistemet mjekësore dhe ato shtetërore. Fëmijët gjithashtu nuk ishin të regjistruar në shkollë.
“Ata ishin mjaft të aftë për t’i mbajtur këta fëmijë larg syve të publikut dhe hetuesve”, tha Wilson, duke shtuar se dukej sikur askush jashtë familjes nuk dinte për ekzistencën e tyre.
Banorët e Hamdenit, një fshat me më pak se një mijë banorë dhe rreth 130 kilometra në juglindje të Columbusit, u tronditën kur mësuan se në atë shtëpi jetonin fëmijë.
Joseph Stewart, 60 vjeç, i tha agjencisë Associated Press se që nga koha kur familja ishte vendosur aty, nuk kishte parë “asnjë fëmijë”.
“Është një situatë e trishtueshme”, tha ai. Stewart jeton në atë rrugë prej gjashtë vitesh dhe e përshkroi zonën si “një lagje të qetë”.
Një tjetër fqinj, Petey Angels, 64 vjeç, i tha gazetës The Columbus Dispatch se ishte i tronditur nga akuzat dhe se gjithashtu nuk kishte parë kurrë fëmijë pranë shtëpisë.
“Këtu nuk ndodh asgjë”, tha Angels për Hamdenin. “Është diçka që nuk do ta prisje në këtë fshat.”
Archer tha se shteti po kërkon kujdestarinë e përkohshme për të gjithë fëmijët.
“Drejtësia do të vihet në vend për këta fëmijë”, deklaroi Wilson.
Sinjali – aty ku e vërteta flet para lajmit!
