Janë arrestuar dy zyrtarë bankarë nën dyshimin se kanë keqpërdorur pozitën e tyre zyrtare, duke ngarkuar një viktimë me kredi prej 25 mijë eurove pa dijeninë e saj, raporton Gazeta Sinjali.
Sipas Policisë, hetimet janë zhvilluar nga njësitë e Drejtorisë për Hetimin e Krimeve Ekonomike dhe Korrupsionit, me autorizim të Prokurorit të Shtetit.
Policia ka bërë të ditur se i dyshuari i parë, në cilësinë e menaxherit bankar, dyshohet se ka tejkaluar autorizimet ligjore duke liruar mjete financiare në vlerë prej 24 mijë eurosh dhe ka urdhëruar kundërligjshëm një zyrtar tjetër që të kryejë transaksionet.
Ndërkohë, i dyshuari i dytë, në cilësinë e analistit bankar, dyshohet se ka ekzekutuar urdhrin verbal duke transferuar 24 mijë euro nga llogaria e të dëmtuarës në dy biznese, nga 12 mijë euro për secilin.
Sipas Policisë, viktima paraprakisht ishte ngarkuar me kredi prej 25 mijë eurosh pa dijeninë e saj, ndërsa më pas kredia është proceduar edhe përmbarimisht.
“Pas veprimeve të kundërligjshme të të dyshuarve, kredia në emër të dëmtuarës është ngarkuar me procedurë përmbarimore, e më pas është kallëzuar penalisht në Prokurori nga banka, edhe pse ky subjekt nuk ka ofruar asnjë provë që dëshmon se në emër të saj është realizuar kredia prej njëzet e pesë mijë (25.000,00) euro. Të dyshuarit e lartë cekur, me veprimet e tyre të dëmtuarës i kanë shkaktuar dëm duke e ngarkuar me kredi fiktive, përfshirë edhe përmbarimin pa dijeninë e saj. Të njëjtit janë intervistuar në prani të mbrojtësve, ndërsa me Aktvendim të Prokurorit u është caktuar masa e ndalimit prej 48 orësh, përderisa hetimet për rastin do të vazhdojnë në aspektin financiar, në drejtim te zbardhjes së shumës prej njëzet e pesë mijë (25.000,00) euro”, thuhet në njoftim.
Sinjali – aty ku e vërteta flet para lajmit!
