Presidenti ukrainas Volodymyr Zelensky ka dënuar sulmin e Rusisë të mërkurën në një maternitet në jug të Ukrainës që vrau një foshnje të porsalindur.
Nëna e fëmijës dhe një mjek u nxorën nga rrënojat e spitalit të shkatërruar në Vilnyansk, rajoni Zaporizhzhia, pas sulmit me raketa, sipas autoriteteve ukrainase.
“Shteti terrorist vazhdon të luftojë kundër civilëve dhe objekteve civile”, tha Zelensky, duke iu referuar Rusisë.
“Armiku ka vendosur edhe një herë të përpiqet të arrijë me terror dhe vrasje atë që nuk mundi ta arrijë për nëntë muaj dhe nuk do të arrijë dot. Përkundrazi, ai do të mbajë llogari vetëm për të gjitha të këqijat që solli në vendin tonë”.
