Xherdan Shaqiri ka lënë të hapur mundësinë e një largimi nga Baseli gjatë merkatos së verës, duke pranuar se e ardhmja e tij në klubin zviceran nuk është e sigurt.
Në një konferencë për media të mbajtur para nisjes së përgatitjeve për sezonin e ri, mesfushori me përvojë u shpreh se nuk mund të premtojë se do të vazhdojë të mbetet pjesë e Baselit pas këtij afati kalimtar.
“Ekziston mundësia që të largohem gjatë kësaj merkatoje”, deklaroi Shaqiri para mediave.
Megjithatë, futbollisti 34-vjeçar theksoi se nuk është duke kërkuar me çdo kusht një transferim dhe se ndihet mirë te Baseli, klub me të cilin ka ende një vit kontratë.
Sipas tij, në futboll asgjë nuk është e garantuar dhe vendimet varen nga zhvillimet që ndodhin brenda klubit. Ai shtoi se do të ndjekë nga afër mënyrën se si do të ndërtohet skuadra për sezonin e ardhshëm, pasi dëshiron të udhëheqë një ekip konkurrues.
Këto deklarata janë interpretuar si një sinjal për drejtuesit e Baselit, sidomos pas një sezoni që nuk përmbushi pritshmëritë, ndryshe nga ai paraprak kur skuadra arriti të fitojë dy trofe.
Shaqiri theksoi se synimi i tij është të arrijë rezultatet më të mira, por nënvizoi se për këtë nevojitet edhe mbështetja dhe cilësia e bashkëlojtarëve.
Në fund, ai u shpreh i qetë për situatën aktuale, duke ritheksuar se është i lumtur te Baseli dhe se kontrata e tij me klubin vazhdon edhe për një sezon.
Deklaratat e tij kanë shtuar spekulimet për të ardhmen, ndërsa mbetet të shihet nëse Baseli do të ndërmarrë hapa për të forcuar ekipin apo nëse Shaqiri do të vendosë të nisë një kapitull të ri në karrierën e tij.
Sinjali – aty ku e vërteta flet para lajmit!
