WhatsApp ka rënë nga funksioni për përdoruesit në të gjithë Mbretërinë e Bashkuar dhe jo vetëm. Me mijëra njerëz raportojnë se nuk janë në gjendje të dërgojnë ose të pranojnë mesazhe.
Downdetector, i cili gjurmon ndërprerjet, tha se më shumë se 12,000 raporte të problemeve ishin dorëzuar deri në orën 8:30 të mëngjesit.
Megjithatë, numri i përdoruesve që përjetojnë probleme mund të jetë shumë më i lartë për shkak të mënyrës se si faqja e internetit mbledh të dhëna, shkruan Skynews.
Shumë prej tyre janë ankuar në platformat e mediave sociale, si Twitter, se aplikacioni nuk po funksionon.
WhatsApp është një nga platformat më të njohura të mesazheve në Mbretërinë e Bashkuar dhe në mbarë botën, dhe vlerësohet të ketë më shumë se dy miliardë përdorues aktiv globalisht.
