Lëvizja Vetëvendosje e ka quajtur pafytyrësi të presidentit Hashim Thaçin, cilësimin si të rrezikshme dhe të dëmshme idenë e diskutimit për Asociacionin e komunave serbe nga kryeministri Avdullah Hoti në Bruksel.
Përmes një reagimi në Facebook, VV ka kujtuar se një rezolutë e tillë është votuar qysh në muajin mars.
Kjo parti ka kërkuar nga Thaçi që para se të paraqesë Asociacionin si rrezik, të japë përgjegjësi për marrëveshjet e mëhershme.
“Nëse ‘Zajednica paraqet rrezik për Republikën e Kosovës, gjë që është krejt e vërtetë, atëherë Presidenti Thaçi duhet të bëjë së paku tre gjëra: të distancohet dhe marrë përgjegjësi për marrëveshjen e prillit 2013, që është themeli i ‘Zajednicës’ që e nënshkroi si Kryeministër; të marrë përgjegjësi për ‘Zajednicën’ e gushtit 2015 të nënshkruar nga Kryeministër Isa Mustafa i shoqëruar nga vet Hashim Thaçi si Zëvendëskryeministër dhe Ministër i Punëve të Jashtme dhe garantonte se ajo ishte në përputhje me Kushtetutën ndërkohë që më vonë doli se ajo e shkelë atë në së paku 23 nene të saj; dhe, të japë përgjegjësi për nënshkrimin e tij në letrën ku FSK-së i ndalohet kalimi në veri të vendit”, thuhet në reagimin e kësaj partie.
Vetëvendosje e ka cilësuar këtë si shtirje të Thaçit “vetëm sa për të mbetur edhe pak në skenën politike”.
