Policia e Kosovës ka gjobitur me 300 euro një shofere, e cila është kapur duke drejtuar automjetin me shpejtësi 197 kilometra në orë në autostradë.
Identifikimi i saj është bërë pasi videoja e vozitjes me shpejtësi të lartë ishte publikuar në rrjetet sociale.
Sipas Policisë, Njësia për Kontrollin e Autostradave ka analizuar pamjet dhe ka arritur ta identifikojë drejtuesen e automjetit.
“Në bazë të video-incizimeve të publikuara në rrjetet sociale, Njësia për Kontrollin e Autostradave ka arritur ta identifikojë shoferen, e cila në zonën ku kufizimi i shpejtësisë ishte 130 km/h, ka drejtuar automjetin me shpejtësi 197 km/h”, thuhet në njoftimin e Policisë.
Përveç gjobës prej 300 eurosh, ndaj shoferes janë shqiptuar edhe tri pikë negative, ndërsa i është ndaluar drejtimi i automjeteve me veprim motorik për tre muaj.
Sinjali – aty ku e vërteta flet para lajmit!
