Veturat personale të shumë qytetarëve të vendit janë shpesh cak i hajnave. E një vjedhje e rëndë është raportuar sot në Istog, ku është vjedhur një kamionetë në oborrin e Agjencisë Pyjore të Kosovës, raporton Gazeta Sinjali.
Sinjali mëson se sot rreth orës 08:30 zyrtari i APK-së, në fshatin Sinë të Istogut, ka vërejtur se në oborrin e institucionit mungon kamioneta e tipit Mercedes e cila ishte e parkuar aty.
Sipas tij, persona të panjohur kane thyer drynin e rrethojës metalike të oborrit dhe kanë vjedhur kamionetën e cila ishte e ngarkuar me dru.
E njëjta kamionetë, e cila është në pronësi të A.H., ishte konfiskuar më 13 maj nga ana e Policisë Kufitare dhe po ruhej në oborrin e APK-së si dëshmi materiale.
E për ‘zhdukjen’ e kamionetës u njoftua edhe Policia, të cilët kanë intervistuar zyrtarin i cili e vërejti se automjeti u vodh.
Sipas burimeve të Gazetës Sinjali, ai ka deklaruar se kamioneta për herë të fundit është parë dje rreth orës 15:00.
Ai ka bërë të ditur se hapësira në të cilën ndodhej e parkuar kamioneta, nuk ka roje, por është zonë nën vëzhgimin e kamerave të sigurisë.
Me urdhër të prokurorit është iniciuar rasti ‘Vjedhje e rëndë’.
