Në një video të publikuar nga kandidati për kryetar të Mitrovicës së Veriut, Aleksandar Arsenijoviq, shihet momenti shokues kur një qytetar goditet nga një veturë, teksa i gjithë aksidenti u incizua nga shoferi që dyshohet se e shkaktoi atë, raporton Gazeta Sinjali.
Lidhur me rastin, për të cilin Policia tha se nuk kanë informacione, Sinjali mëson se ka ndodhur rreth 6 ditë më parë përballë stacionit hekurudhor në Leposaviq.
Sinjalizuesi i Gazetës Sinjali në veri të vendit, ka bërë me dije se shoferi që dyshohet se shkaktoi aksidentin është Milan Vukasinoviç i njohur si Duduk, ndërsa viktima është Vladisavljeviç Darko.
Kujtojmë se nga Policia e Kosovës kanë deklaruar për Gazetën Sinjali se për rastin janë informuar nga rrjetet sociale.
Besim Hoti, u. d i drejtorit të Policisë Rajonale në Mitrovicën e Veriut u shpreh se rasti është “i panjohur” dhe se “nuk dihet koha se kur ka ndodhur rasti”.
Ndryshe, Arsenijoviq kishte shkruar në Facebook se është i tmerruar nga ky rast teksa shpreson që i dyshuari të përgjigjet për këtë vepër.
“Më tmerron skena e komunës së Leposaviqit ku një burrë (nëse mund të quhet kështu) shkel një njeri në rrugë në mungesë të policisë, duke plotësuar disa nga tekat e tij personale. Shpresoj që një ditë të përgjigjet për këtë krim!”, ka shkruar ai në mbishkrimin e videos.
