Zëvendëskomandanti i Batalionit të Marinës në Mariupol, Serhiy Volyna, ka thënë se forcat ushtarake ruse po përpiqen ta fshijnë Mariupolin nga ‘faqja e dheut’.
Volyna i cili ka luftuar në rajon që nga viti 2014 kur Rusia aneksoi Krimenë, ka thënë se atje është një katastrofë humanitare.
“Është një katastrofë humanitare. Ka probleme me furnizimin me ujë, ushqim, mjekim dhe furnizim të përgjithshëm. Është një situatë shumë e vështirë” tha ai.
“Ne jemi të rrethuar në Mariupol për më shumë se 40 ditë. Armiku na tejkalon në numër dhe për sa i përket armatimit, artilerisë së tyre, ata kanë artileri me bazë deti, tanke, mjete të blinduara dhe sigurisht mortaja. Është e vështirë për ne, “tha Volyna.
“Është bombardim ajror… Ata po fshijnë qytetin nga faqja e dheut, ata po përdorin gjithashtu tanket e tyre,” vazhdoi ai.
Volyna shërbeu me forcat ukrainase gjatë aneksimit të Krimesë në vitin 2014 dhe gjithashtu shërbeu me forcat ukrainase dhe mori pjesë në operacionet ushtarake në rajonet Donetsk dhe Luhansk, tani të kontrolluara nga separatistët e mbështetur nga Rusia.
Kur u pyet nëse ai mund të luftojë tani kundër ish-kolegëve që kaluan në anën ruse, u përgjigj: “Po, sigurisht që është plotësisht e mundur”.
Ai e quajti një “situatë të çuditshme” që ish-anëtarët ose marinsat ukrainas dhe Roja Bregdetare e Flotës së Detit të Zi po “luftojnë” tani në njësitë ruse, duke i etiketuar ata “armiq të vendit tonë”.
Për sa i përket qëllimeve të Rusisë kur bëhet fjalë për Mariupolin, ai tha se së pari, Rusia dëshiron të përdorë qytetin për të “siguruar furnizimin me ujë të Krimesë”. Qëllimi i dytë i Rusisë në Mariupol është “të pushtojë të gjithë territorin bregdetar, pranë Azov dhe Detit të Zi dhe t’i ndërpresë Ukrainës hyrjen në det”, tha ai.
