Presidenti amerikan, Donald Trump, ka paralajmëruar vendosjen e një tarife të re dhe “të konsiderueshme” ndaj Bashkimit Evropian, pas gjobave që blloku evropian i vendosi kompanisë Google për praktika të paligjshme tregtare.
Në një postim në platformën “Truth Social”, Trump e akuzoi BE-në se po dëmton kompanitë amerikane dhe paralajmëroi se penalitetet ndaj Google duhet të anulohen.
“Bashkimi Evropian do të paguajë një çmim shumë të madh për këtë sjellje të paligjshme dhe jashtëzakonisht të pamoralshme”, shkroi Trump.
Ai bëri të ditur se administrata amerikane po përgatitet të nisë një hetim tregtar dhe se një tarifë e re ndaj BE-së mund të vendoset në një afat të shkurtër.
Kërcënimi erdhi pasi Përfaqësuesi amerikan i Tregtisë, Jamieson Greer, paralajmëroi se veprimet e BE-së ndaj Google mund të rrezikojnë marrëdhëniet tregtare me Shtëpinë e Bardhë.
Në pikëpyetje është edhe marrëveshja e njohur si “Turnberry”, e arritur mes Trumpit dhe presidentes së Komisionit Evropian, Ursula von der Leyen, e cila kufizonte tarifat amerikane ndaj eksporteve të BE-së në 15 për qind.
Ndonëse tarifat e fundit ndaj BE-së u vendosën në nivelin 10 për qind, duke respektuar marrëveshjen, deklaratat e reja të Trumpit kanë ngritur shqetësime për një prishje të mundshme të saj.
“SHBA-ja nuk është një arkë kursimi për Evropën dhe nuk do ta lejojmë këtë”, shkroi Trump.
Kryetari i Komitetit për Tregtinë Ndërkombëtare në Parlamentin Evropian, Bernd Lange, paralajmëroi se zbatimi i kërcënimit mund ta rrëzojë marrëveshjen dhe të sjellë përshkallëzim të mëtejshëm tregtar.
Ai tha se BE-ja mund të shqyrtojë përdorimin e Instrumentit Kundër-Koercionit, i njohur edhe si “bazuka tregtare”, nëse SHBA-ja përdor tarifat për presion politik.
Ndërkohë, administrata Trump po zhvillon edhe hetime të tjera tregtare ndaj disa vendeve, përfshirë Kinën, BE-në, Korenë e Jugut, Japoninë, Indinë dhe Meksikën, të cilat mund të përballen me tarifa më të larta.
Sinjali – aty ku e vërteta flet para lajmit!
