Kryeministri i vendit Albin Kurti, ka falënderuar Emiratet e Bashkuara Arabe, sipas tij për kontributin e çmuar ndaj shtetit të Kosovës.
Në inaugurimin e spitalit për fëmijë, Kurti u shpreh se përveç investimit në infrastrukturën shëndetësore, ky projekt është investim direkt edhe në shëndetin e fëmijëve në Kosovë.
”Është kënaqësi e madhe të jem sot këtu në hapësirën e QKUK-së”.
”U jemi mirënjohës Emirateve të Bashkuara Arabe. Vend mik që ka dhënë kontribut të çmuar. Përveçse investim në infrastrukturën shëndetësore, ky projekt është investim edhe në shëndetin e fëmijëve”, tha ai.
”Fëmijët janë qytetarët e ardhshëm të demokracisë tonë. Edhe kur kemi shkruar zotimet, edhe kur jemi në krye të shtetit”.
“Me programin e qeverisë jemi zotuar se do të angazhohemi. Ky spital do të kontribuojë në fillimin e mirëqenies së fëmijëve të Kosovës”, shtoi kryeministri.
”Në emër të Qeverisë dhe popullit të Republikës së Kosovës dhe emrin tim personal shpreh falënderim për Emiratet e Bashkuara Arabe”.
”Falënderoj presidenten Jahjaga, për angazhimin e saj dhe të gjitha ekipet që ndërvite kanë punuar për realizimin e këtij projekti”.
Për fund Kurti tha se ”Do të angazhohemi të gjithë së bashku që fëmijëve t’u garantojmë mirëqenie dhe të ardhmen që meritojnë. Do të punojmë bashkërisht në realizimin e vizionit tonë”.
