image Sot jepet fjala përfundimtare në rastin ndaj Kristë Gjokajt dhe policëve që keqtrajtuan qytetarin në stacion - Sinjali

Sot jepet fjala përfundimtare në rastin ndaj Kristë Gjokajt dhe policëve që keqtrajtuan qytetarin në stacion

news image

Sot duke filluar nga ora 13:00 do të mbahet seanca ndaj ish-komandantit të stacionit policor në Gjakovë, Kristë Gjokaj dhe zyrtarëve të tjerë policorë, të cilët po akuzohen për keqtrajtimin e një të prangosuri brenda stacionit policor. Në seancën e sotme do të jepet fjala përfundimtare lidhur me këtë rast.

Seanca e fundit ndaj të akuzuarve, pas kthimit të rastit në rigjykim është mbajtur më 6 prill, ku Kristë Gjokaj dhe tre zyrtarët policorë Bekim Preqi, Gëzim Biblekaj dhe Agron Idrizi, janë deklaruar të pafajshëm për akuzat se keqtrajtuan qytetarin në stacionin policor. Derisa i akuzuari tjetër, Milot Ukaj e kishte pranuar fajësinë në mënyrë të pjesshme, por që i ishte refuzuar nga gjyqtari.

Në seancën e kaluar është bërë shikimi dhe dëgjimi i video-incizimeve lidhur me rastin, raporton Gazeta Sinjali.

Ndryshe, Gazeta Sinjali kishte raportuar ekskluzivisht për këtë rast, duke publikuar edhe videon e trajtimit çnjerëzor të qytetarit të prangosur në stacionin policor të Gjakovës.

Sipas aktakuzës, komandanti Kristë Gjokaj, më 14 nëntor 2018, në objektin e stacionit policor në Gjakovë, ka keqtrajtuar të dëmtuarin Muhamer Raifi i cili kishte qenë i arrestuar dhe i prangosur si i dyshuar për dy vepra penale, në atë mënyrë që derisa ishte ulur në karrige, i njëjti e godet me grusht në fytyrë, me ç’rast e rrëzon në dysheme, derisa nga aty të pandehurin e largon një zyrtar policor.

Ndërsa për katër të akuzuarit e tjerë theksohet se kanë keqtrajtuar të dëmtuarin Muhamer Raifi, ashtu që me qëllim që të nxjerrin informacione, për personat e tjerë të përfshirë në kryerjen e veprave penale, për të cilat i dëmtuari ka qenë i dyshuar, e sulmojnë fizikisht, duke i shkaktuar lëndime të lehta trupore, për të cilat është detyruar të kërkonte tretman mjekësor.

Shaban Limanaj akuzohet se ka kryer veprën tjetër penale ‘’Keqpërdorimi i pozitës apo autoritetit zyrtar’’.

Sipas aktakuzës, Shaban Limanaj, si person përgjegjës në qendrën e ndalimit në Gjakovë, nuk i ka përmbushur detyrat zyrtare, pasi iu ka mundësuar policëve Milot Ukaj, Gëzim Biblekaj dhe Agron Idrizi të futen në qelinë ku ndodhej i dëmtuari Muhamer Raifi të cilët pastaj e kanë keqtrajtuar duke e sulmuar fizikisht.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

/GazetaSinjali/


Shpërndaje artikullin