Shtetet e Bashkuara njoftuan të dielën vonë se do ta dërgojnë një aeroplanmbajtës modern, luftanije dhe avionë luftarakë në lindje të Detit Mesdhe dhe se do t’i japin Izraelit pajisje dhe municion shtesë.
Ky vendimi i SHBA-së vjen pas sulmit nga Hamasi në jug të Izraelit, të cilin presidenti amerikan Joe Biden e ka quajtur “të paprecedent dhe të tmerrshëm”.
Izraeli thotë se më shumë se 700 njerëz janë vranë dhe 100 të tjerë janë rrëmbyer nga Hamasi.
Në Gaza, më shumë se 400 njerëz janë vrarë pas bombardimeve ajrore hakmarrëse nga Izraeli, sipas zyrtarëve palestinezë.
Sekretari i Mbrojtjes i SHBA-së, Lloyd Austin, tha të dielën se aeroplanmbajtësi USS Gerald R. Ford, një luftanije dhe katër shkatërrues raketorë janë nisur për Izrael. Do të dërgohen edhe avionë luftarakë amerikanë.
Shtëpia e Bardhë tha se do t’i dërgojë ndihma shtesë ushtarake Izraelit në ditët në vijim, duke thënë se SHBA-ja po punon për t’u siguruar se armiqtë e Izraelit nuk do të mundë të kërkojnë ta shfrytëzojnë këtë situatë.
USS Gerald R. Ford – aeroplanmbajtësi më modern dhe më i përparuar i marinës amerikane, dhe rreth 5.000 marinarët dhe avionët e saj luftarakë që do të shoqërohen nga luftanije dhe shkatërrues – kanë për qëllim të jetë të gatshëm për t’u përgjigjur ndaj çdo gjëje, përfshirë parandalimin e dërgimit të armatimit shtesë Hamasit, si dhe vëzhgimin.
Presidenti i Iranit, Ebrahim Raisi, ka shprehur mbështetjen e tij për sulmin e Hamasit, duke thënë se Izraeli duhet të mbahet përgjegjës për rrezikimin e rajonit.
Sekretari i Shtetit i SHBA-së, Antony Blinken, tha se SHBA-ja nuk ka parë dëshmi të përfshirjes së drejtpërdrejt të Iranit, por tha se Irani e ka ndihmuar grupit me bazë në Gaza për shumë vite.
“Hamasi nuk do të ishte Hamasi pa përkrahjen që e ka marrë ndër vite nga Irani. Ne nuk kemi parë prova se Irani është i përfshirë në këtë sulm të caktuar, por mbështetja e tyre ndër vite është e qartë”, tha Blinken për US TV.
Në takimin e Këshillit të Sigurimit, Irani e mohoi përfshirjen në sulmin kundër Izraelit, sipas Reuters.
