Kolumbia po shkon në zgjedhje për të zgjedhur presidentin e ri, në një garë që konsiderohet vendimtare për drejtimin politik të vendit.
Zgjedhjet mbahen pas muajsh tensionesh politike mes presidentit aktual të majtë, Gustavo Petro, dhe presidentit amerikan Donald Trump, për çështje si trafiku i drogës dhe ndërhyrja e SHBA-së në rajon.
Petro nuk mund të rikandidojë dhe ka shprehur mbështetjen e tij për kandidatin Iván Cepeda. Kundër tij garojnë kandidatët e djathtë Abelardo de la Espriella dhe Paloma Valencia, raporton BBC, transmeton Sinjali.
Votimi zhvillohet të dielën, nga ora 08:00 deri në 16:00 sipas kohës lokale (13:00–21:00 GMT). Asnjë prej kandidatëve nuk pritet të sigurojë shumicë absolute, ndaj një balotazh është i mundshëm më 21 qershor.
Sipas sondazheve, Cepeda shihet si kandidati me më shumë mbështetje, i ndjekur nga de la Espriella.
Cepeda ka premtuar vazhdimin e politikës së Petro-s për “paqen totale”, që synon marrëveshje me grupet e armatosura, ndonëse këto bisedime kanë hasur vështirësi dhe rritje të dhunës.
Ndërkohë, de la Espriella dhe Valencia mbështesin një qasje më të ashpër ushtarake ndaj krimit dhe forcimin e lidhjeve me SHBA-në.
Fushata është zhvilluar në një klimë dhune të vazhdueshme politike, ndërsa vendi përballet me sfida serioze të sigurisë dhe trafikut të drogës, të cilat pritet të ndikojnë drejtpërdrejt në drejtimin e ardhshëm të Kolumbisë.
Sinjali – aty ku e vërteta flet para lajmit!
