Të enjten, në Granada të Spanjës, do të zhvillohet samiti i Komunitetit Politik Evropian (EPC), ku pjesëmarrëse do të jetë edhe presidentja e Kosovës, Vjosa Osmani.
Në samit do të marrë pjesë edhe homologu i saj nga Serbia, Aleksandar Vuçiq.
Mediat ndërkombëtare kanë raportuar se dyshja e fortë evropiane, Olaf Scholz i Gjermanisë dhe Emmanuel Macron i Francës mund të tentojnë t’i bëjnë bashkë Osmanin e Vuçiqin për një takim.
“Që nga mbrëmja e së mërkurës, nuk kishte plane për bisedime të ndërmjetësuara ndërmjet Kosovës dhe Serbisë në mes të armiqësisë së vazhdueshme politike midis dy vendeve. Udhëheqësit nga të dyja palët do të jenë në Granada dhe nuk është përjashtuar një ndërhyrje e minutës së fundit nga Macron ose kancelari gjerman, Olaf Scholz, për t’i futur ata në të njëjtën dhomë”, ka raportuar “The Guardian”.
EPC është ideja e Emmanuel Macron, por në prapaskenë liderët po ngrenë gjithashtu pyetje në lidhje me qëndrueshmërinë e saj në të ardhmen.
Vizioni i EPC-së ishte krijimi i një platforme për diskutime joformale midis liderëve brenda dhe jashtë BE-së dhe futja e shteteve të Ballkanit, Turqisë dhe Armenisë dhe Azerbajxhanit fort në tendën evropiane.
Zgjerimi dhe lufta ruse do të mbeten në krye të agjendës në të gjitha diskutimet, veçanërisht në vazhdën e shqetësimeve të fundit në ShBA mbi kontributet e vazhdueshme në mbrojtjen e Ukrainës.
Zgjerimi i BE-së do të jetë gjithashtu pika kryesore e rendit të ditës në takimin e dytë të liderëve të BE-së të premten në mëngjes.
Në 24 orët e fundit u raportua se mund të kushtojë të paktën 250 miliardë euro për të akomoduar të nëntë vendet që presin të anëtarësohen në BE.
Disa vende tashmë po mbështesin vitin 2027 si afat të fundit për reformat brenda BE-së dhe thonë se nëse modelimi i buxheteve do të ishte nënshkruar deri atëherë, akomodimi i vendeve të reja do të ishte më i lehtë.
Disa besojnë se mund të ketë një pranim gradual me faza të shteteve të reja, por të tjerët, duke përfshirë kryediplomatin e BE-së, Josep Borrell, e kanë hedhur poshtë atë nocion duke thënë se anëtarësimi i vetëm është anëtarësimi i plotë.
Presidentja e vendit, Vjosa Osmani, gjatë ditës së sotme ka arritur në Granada të Spanjës, në kuadër të Samitit Politik Evropian.
Ajo shkruan në platformën X, se në këtë samit do diskutojë sfidat e sigurisë së Kosovës pas aktit të agresionit të Serbisë.
”Në takime me kolegët udhëheqës, do të diskutoj sfidat e sigurisë në Kosovë pas aktit të agresionit të Serbisë dhe do të ritheksoj angazhimin tonë për thellimin e bashkëpunimit me aleatët për paqen, stabilitetin dhe sigurinë afatgjatë”, shkroi Osmani.
