Banorët në Mariupol të Ukrainës këtë mëngjes thanë se qyteti port në detin Azov ishte i rrethuar nga forcat ruse dhe nën sulm të rëndë.
Ata nuk ishin në gjendje të konfirmonin nëse forcat ruse kanë zbarkuar në bregdet dhe e kanë pushtuar portin, ku ndodhej flota e vogël e Ukrainës dhe anija komanduese Donbas.
“Ne dëgjojmë aeroplanë në qiell. Është me vranësira dhe nuk mund të dimë nëse janë tanët apo rusët”, tha Anatoliy Lozar për Guardian këtë mëngjes, duke folur nga një bodrum i Mariupolit ku ishte strehuar me familjen e tij.
Lozar tha se po ndihmonte në evakuimin e civilëve pas një nate tjetër të bombardimeve të rënda. Ai tha se avionët luftarakë rusë e kanë bombarduar fshatin Shyrokyne, 20 km në perëndim të Mariupolit, raporton The Guardian.
Fshati në vijën e frontit me Republikën Popullore separatiste të Donetskut ishte ende nën kontrollin e Ukrainës, tha ai.
“Një numër i madh vullnetarësh i janë bashkuar ushtrisë. Ne kemi armë. Ne do të luftojmë deri në njeriun e fundit”, shtoi ai.
Lozar tha se ishin bërë përpjekje për të evakuuar të plagosurit me helikopterë, të cilët janë vënë nën zjarrin rus. Ai tha se disa grupe diversioniste ruse kanë marrë me qira apartamente brenda qytetit përpara pushtimit dhe kanë komplotuar sulme.
Pavarësisht një fillimi të ngadaltë të ofensivës së saj ushtarake dhe rezistencës së ashpër të Ukrainës, Rusia po i afrohet qëllimit të saj strategjik për të kapur brezin 250 km përgjatë detit Azov, midis gadishullit të Krimesë dhe Mariupolit.
Forcat ruse pushtuan qytetin e vogël port të Berdyansk mbrëmë, konfirmoi kryebashkiaku i tij Oleksandr Svidlo, dhe morën ndërtesën e administratës.
Videoja tregoi automjete të blinduara të shënuara me Z që patrullonin rrugët e Berdyansk.
