Guvernatori i rajonit ukrainas të Donjeckut pretendon se Rusia nuk po e përmbush premtimin e saj të premten për të lejuar një korridor humanitar nga Mariupol kah juglindja.
Ndërkohë, Kryqi i Kuq thotë se ende po shqyrtohet logjistika komplekse për dërgimin e ambulancave në Mariupol dhe të civilëve nga qyteti, i cili ka pësuar luftime të ashpra për javë të tëra dhe me gjithnjë e më pak ujë, ushqime dhe furnizime mjekësore.
“Po na mbarojnë mbiemrat për të përshkruar tmerret e vuajtura nga njerëzit e Mariupolit”, tha zëdhënësi i Komitetit Ndërkombëtar të Kryqit të Kuq, Ewan Watson, gjatë një konferencë të OKB-së në Gjenevë.
“Situata është e tmerrshme dhe gjithçka po përkeqësohet. Tani është imperativ humanitar që të lejohen njerëzit të largohen dhe të lejohet hyrja e furnizimeve me ndihma”.
Ai tha se grupi dërgoi tri automjete drejt Mariupolit dhe vijës së frontit midis forcave ukrainase dhe ruse, por dy kamionët që transportonin furnizime për qytetin nuk i ndoqën.
Dhjetëra autobusë të organizuar nga autoritetet ukrainase për të evakuuar njerëzit gjithashtu nuk kanë filluar t’i afrohen vijës ndarëse, tha Watson./rel
