Rusia tha të enjten se po vendoste kufizime ndaj diplomatëve britanikë, duke u kërkuar atyre që të njoftojnë pesë ditë për çdo plan për të udhëtuar përtej një rrezeje prej 120 km (75 milje), për shkak të atyre që i quajti “veprimet armiqësore” të Londrës.
I ngarkuari me punë i Britanisë në Rusi u thirr në ministrinë e jashtme në Moskë për t’u qortuar për atë që Moska tha se ishte mbështetje për “veprimet terroriste” të Ukrainës dhe për pengim të diplomacisë ruse në Britani.
“Pala britanike u informua gjithashtu për vendimin për të futur një procedurë njoftimi për lëvizjen e punonjësve të misioneve diplomatike britanike në territorin e vendit tonë si përgjigje ndaj veprimeve armiqësore të Londrës”, njofton Reuters.
Diplomatëve britanikë, me përjashtim të ambasadorit dhe tre diplomatëve të tjerë të lartë, do t’u kërkohet të dërgojnë njoftim për çdo plan për të udhëtuar përtej “zonës së lëvizjes së lirë” 120 km (75 milje) të paktën pesë ditë pune përpara.
“Një dokument i tillë duhet të përmbajë informacione për kohën, qëllimin, llojin e udhëtimit, kontaktet e planifikuara të biznesit, personat shoqërues, llojin e transportit, vendet e vizitës dhe akomodimit, si dhe itinerarin e udhëtimit”, tha ministria.
