Ende pa i mbushur të 20-tat, ka një histori të pasur kriminale dhe me raste të ndryshme. 18-vjeçari Edison Ademaj nga komuna e Prizrenit, disa herë ka rënë në prangat e Policisë së Kosovës, kryesisht për raste të vjedhjeve. E së fundi ai u arrestua për vjedhjen e një telefonit, të cilën dyshohet se e kreu në shtator të këtij viti, raporton Gazeta Sinjali.
Burimet e Gazetës Sinjali brenda Prokurorisë kanë bërë me dije se një 61-vjeçare kishte raportuar në Polici se dikush ka marrë telefonin e saj personal i cili ndodhej në lokalin e viktimës.
Nga kamerat e sigurisë që monitorojnë lëvizjet në lokalin e saj, ajo kishte vërejtur se i dyshuari është një person i moshës së re, i cili ka shfrytëzuar mungesën e 61-vjeçares në lokal për të hyrë dhe për të kryer vjedhjen që kishte cak.
E pas më shumë se dy muajsh, Policia e Kosovës ka arritur që të identifikojë të dyshuarin, i cili doli të jetë i famshmi Edison Ademaj, që vetëm brenda këtij viti u arrestua disa herë për vjedhje të veturave e nëpër shtëpi private.
Pas arrestimit, Ademaj është shoqëruar në stacion policor për intervistim dhe ndaj tij është iniciuar rasti ‘Vjedhje e rëndë’.
Me urdhër të prokurorit, Ademaj është dërguar në mbajtje për 48 orë.
Por kush është Edison Ademaj, i riu me dosje kriminale?
18-vjeçari Edison Ademaj u kap nga Polica e Kosovës më 22 maj, në rrugën “Adem Jashari”, në Prizren, derisa një njësi policore po patrullonte. Edisoni u ndalua pasi Policia dyshonte se i njëjti kishte kryer ndonjë rast të kundërligjshëm, meqë u has duke e shtyrë një skuter, në pikë të natës. Për shkak të dyshimeve dhe mungesës së dokumentacionit për posedim të këtij automjeti, Policia e shoqëroi Edisonin në stacion policor.
Gjatë verifikimit të të dyshuarit nga ana e Policisë, u kuptua se 18-vjeçari nuk ishte pronari i automjetit me të cilën u kap dhe rasti kishte të bënte me vjedhje, raporton Gazeta Sinjali.
Burimet e Gazetës Sinjali bëjnë me dije se Edison Ademaj e kishte vjedhur këtë automjet në korridorin e një banese, ku përmes forcës kishte arritur ta thyente bllokadën dhe ta ‘avullonte’ motorin.
Pas përfundimit të procedurave në stacion policor, Prokurori i Shtetit ka nxjerrë aktvendim për ndalimin e tij, në kohëzgjatje prej 48 orëve, periudhë kjo që ende s’ka përfunduar dhe pritet të ndërmerren veprimet hetimore nga Prokuroria.
Por kjo nuk është hera e parë që 18-vjeçarin Edison Ademajn e zuri sherri me Policinë.
Më 17 maj, ai u arrestua për një rast tjetër të vjedhjes, në fshatin Gurrakoc të Istogut. Bëhet fjalë për vjedhjen e një vetureje luksoze Mercedes G Class, të cilën arriti ta kap në parkingun e një biznesi. Por këtë herë, ai u përball me një qytetar që luajti rolin e policit, duke iu vënë pas të dyshuarit derisa ia dorëzoi veturën e tij.
Pronari i veturës e kuptoi që 18-vjeçari ia vodhi veturën, pasi dikush iu drejtua me fjalët “të shkoi kerri”. Kjo e bëri atë të reagojë shpejt, duke marrë një veturë tjetër me të cilën e ndoqi pas hajnin. Ai arriti t’ia bllokojë rrugën Edison Ademajt dhe ta marrë sërish veturën.
Atë natë, Policia u njoftua menjëherë për rastin dhe i riu u arrestua, por që refuzoi të përgjigjej në të gjitha pyetjet gjatë intervistimit nga hetuesit policorë. 48 orë që qëndroi në mbajtje, siç duket atij i shërbyen për të bërë planin për vjedhjen e radhës, që ndodhi mbrëmë në Prizren.
Rastet e vjedhjeve në Prizren për të cilat dyshohet Edisoni janë më të shpeshta.
Gazeta Sinjali pati raportuar ekskluzivisht se si Edison Ademaj bashkë me Besim Memajn, planifikuan të vjedhin veturën e tyre, të sekuestruar nga Policia e Kosovës më 1 janar. Plani i tyre dështoi pasi ata u kapën nga Policia e Kosovës kur tentuan të vjedhin veturën “Renault Clio”, me targa vendore, e cila ishte sekuestruar për shmangie nga obligimet doganore. Atë ditë, Policia fillimisht arriti të arrestojë Besim Memajn, por pas një kohe të shkurtër ka rënë në prangat e Policisë edhe Edison Ademaj.
18-vjeçari u lirua për këtë rast të tentim vjedhjes, por pa kaluar një javë, ishte arrestuar sërish.
Më 11 janar të këtij viti, një njësi policore e stacionit policor në Prizren e arrestoi Edison Ademajn në fshatin Vlashnje të Prizrenit, pasi dyshohej se kishte kryer vjedhje të rëndë në një shtëpi, më 1 janar. Ai dyshohet se hyri me forcë brenda një shtëpie, nga ku vodhi një shumë të parave.
Por këto nuk janë rastet e vetme për të cilat Prokuroria ka informacione se Edison Ademaj ka kryer vjedhje gjithandej vendit. Edisoni, me dosje kriminale për plot raste ka qenë edhe në paraburgim, me vendimin e 12 janarit të Gjykatës Themelore në Prizren, që ia caktoi këtë masë të sigurisë, të cilën posa e përfundoi vazhdoi me avazin e vjetër.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
