Sergio Ramos nuk po mendon të largohet nga Paris Saint-Germaini, pavarësisht lëndimit të gjatë që ia ka pamundësuar të debutojë për klubin e ri, sipas vëllait dhe menaxherit të tij, Rene.

Ramos ende nuk e ka zhvilluar asnjë minutë lojë për liderin e Ligue 1 që prej se iu bashkua atij nga Real Madridi në verë, për shkak të një telashi të vazhdueshëm me pulpën e këmbës.

Telashet e tij fizike nxitën dyshime së fundmi se mbrojtësi spanjoll mund të pajtohet me klubin për shkëputjen e parakohshme të marrëveshjes.

Por Rene i ka hedhur poshtë këto dyshime në një intervistë për El Mundo.

“Sergio Ramos nuk e ka ndërmend të pensionohet apo ta prishë kontratën”, tha Rene.

Ai shtoi: “Nuk ka dyshim për Sergion. Ky është një telash fizik, ai do të luajë kur të mundet”.

Sipas një njoftimi të PSG-së, Ramosi do t’i rifillojë stërvitjet javën e ardhshme.

Nëse ai mund të stërvitë pa telashe, atëherë debutimin e shumëpritur mund ta bëjë më 20 nëntor, menjëherë pas ndeshjeve të kombëtareve./Gazeta Sinjali Sporti/