Barcelona tashmë e di modelin e tri fanellave të saj për sezonin e ardhshëm. Sipas “Mundo Deportivo”, përfaqësuesit e “Nike” ishin në ambientet sportive të klubit katalanas për t’u takuar me lojtarët.

Këta të fundit bënë një set fotogrash me uniformat e reja, që do t’i veshin gjatë sezonit 2020-2021. Këto modele janë “filtruar” për publikun nga portali “Footy Headlines”.

Uniforma e parë do të rikthejë vijat vertikale. Sidoqoftë, midis secilës prej vijave blu dhe ngjyrë gjaku (azulgrana), do të ketë një vijë të verdhë, që duket mrekullueshëm. Ajo do të mbizotërojë edhe te pjesa e qafës, ashtu edhe te logoja, apo në fund të mëngëve. Reklamat e “Rakuten” dhe “Beko” do të stampohen te pjesa e gjoksit dhe te mëngët.

Sa për uniformën e dytë, ajo do të ketë një dizajn shumë më elegant, sfondi i zi dhe mbi të logo, sponsori etj. në ngjyrë ari. Kompleti i tretë do të jetë identik me të dytin, por duke ndryshuar të zezën për një rozë të fortë dhe arin për të zezën.

Dallimi është se në këtë rast logoja do të mbajë modelin dhe ngjyrat e saj tradicionale. Ende nuk dihet se si do të vishen portierët e ekipit katalanas, sezonin e ardhshëm, por Messi, Suárez, Piqué dhe të tjerë do të spikasin me ngjyrat azulgrana, e zezë dhe rozë.