Dje rreth orës 10:00 në rrugën “Ylber Fanaj” në Prizren si pasojë e një përleshje me thika ka mbetur i vdekur një 15-vjeçar me inicialet L.B., raporton Gazeta Sinjali.
Prokuroria Themelore në Prizren sot njoftoi se 15-vjeçari ishte goditur me thikë në pjesën e majtë të gjoksit, plagë e cila i kushtoi me jetë.
“Në bazë të informacioneve një nga sulmuesit e kishte goditur viktimën me një mjet të mprehtë përkatësisht me thikë në pjesën e majtë të gjoksit, e cila ka rezultuar me pasoja fatale për viktimën. Prokurori kujdestar së bashku me njësitet policore relevante kanë dalë në vendin e ngjarjes dhe kanë siguruar provat materiale”, thuhet në komunikatën e prokurorisë.
Sipas prokurorisë, të miturit e përfshirë në këtë përleshje kishin poseduar një armë zjarri dhe dy thika.
Trupi i pajetë i 15-vjeçarit ndodhet në Institutin e Mjekësisë Ligjore, ku është dërguar për obduksion.
Ndërkohë, prokuroria ka kërkuar nga gjykata që ndaj të miturit që dyshohet se e ka shkaktuar vrasjen të caktohet masa e paraburgimit, ndërsa dy të miturit e tjerë, që dyshohet se kanë marrë pjesë në përleshje, janë liruar në procedurë të rregullt.
