Kompania Rajonale e Ujësjellësit “Prishtina” ka bërë të ditur se për shkak të problemeve me energji elektrike disa pjesë të kryeqytetit mund të mbesin pa ujë.
Sipas KRU “Prishtina”, pasditen e së martës ka pasur defekt në linjën e KOSTT-it ku impianti i trajtimit të ujit Albanik/Batllavë ka mbetur pa furnizim me energji elektrike nga ora 17:00.
Tashmë probleme me furnizimin me ujë ka pasur Podujeva me ç’rast mund të afektohen edhe zonat e Prishtinës.
“Si pasojë e defektit në linjën e KOSTT, Impianti i Trajtimit të ujit Albanik/ Batllavë ka mbetur pa furnizim me energji elektrike nga ora 17:00. Kjo ka shkaktuar destabilizimin e furnizimit me ujë për Podujevë, me ç’rast mund të afektohen edhe zonat e Prishtinës që furnizohen nga sistemi i Albanikut-Batllavës. Pa energji elektrike është edhe Stacioni i Pompave në Peran”, thuhet në njoftimin e KRU “Prishtina”.
