Nuk janë të rralla rastet kur disa vende të Kosovës anashkalohen nga mirëmbajtja e pastërtisë dhe largimi i mbeturinave nga kompanitë e pastrimit, shkruan Gazeta Sinjali.
Lidhur me keqmenaxhimin e mirëmbajtjes së mbeturinave, banorët e Gjilanit, konkretisht ata të cilët jetojnë te Tregu i Gjelbër janë ankuar në adresë të Gazetës Sinjali se kanë probleme me kompaninë e pastrimit “EL BAU”.
Njëri nga sinjalizuesit për Sinjalin ka deklaruar se është një pjesë në qendër të qytetit që aty bëhet grumbullimi i mbeturinave.
Ai është ankuar se në atë pjesë mbeturinat po qëndrojnë aty me ditë të tëra dhe gjendja është e tmerrshme edhe nga era e cila kundërmon.
Gazeta Sinjali lidhur me rastin ka kontaktuar pronarin e kompanisë “EL BAU”, i cili ka premtuar se ato mbeturina të cilat janë hedh aty do të largohen.
Ai ka deklaruar se: “nesra në mëngjes heket”. Tutje lidhur me rastin që mbeturinat hedhen në mënyrë të pakontrolluar ai ka thënë se “ka disa qytetarë që nuk i paguajnë mbeturinat vetë dhe ato mbeturina i vendosin vend e pavend, si rasti në fjalë”.
Kjo kompani e pastrimit në mëngjesin e ditës së sotme ka larguar ato mbeturina dhe ka dërguar pamje nga vendi i ngjarjes ku është bërë largimi i tyre.
Sinjalizuesi ka deklaruar se mbeturinat janë larguar qysh në orën 06:00 të mëngjesit.
