Presidentja e Kosovës, Vjosa Osmani, ka folur për pandeminë, marrëdhëniet me Shqipërinë, SHBA dhe Bashkimin Evropian dhe pritshmëritë e saj nga Gjermania në një intervistë për DW, përcjell Gazeta Sinjali.

Presidentja Osmani ka folur gjithashtu edhe për akuzat për shtyrjen e zgjedhjeve lokale, ku këto akuza ajo i ka quajtur absurde.

“Këto janë akuza absurde nga ata që nuk mund të gjejnë argumente për t’i bindur qytetarët për t’i përkrahur e tentojnë që këtë ta bëjnë nëpërmjet propagandës së ulët dhe të ndytë. Në radhë të parë unë nuk kam parti, jam Presidente e Republikës së Kosovës dhe shikoj vetëm një interes e ai është interesi i qytetarëve të Republikës së Kosovës. Unë e di që këta njerëz janë mësuar me presidentë, të cilët u kanë shërbyer interesave të ngushta e klandestine e shpeshherë edhe të lidhura me rrjete të ndryshme. Unë nuk jam e tillë dhe ata e dinë këtë shumë mirë, prandaj edhe nuk po munden të pajtohen me faktin se e kanë një presidente, e cila është komplet e lirë nga ndikimet e jashtme dhe e cila merr vendime në mërye komplet autonome e vetëm e vetëm në interes të qytetarëve të Kosovës’, ka thënë Osmani.

Ndryshe, Presidentja Osmani para pak ditësh ka ftuar partitë politike për t’u konsultuar rreth shtyrjes së datës së zgjedhjeve, ku partitë politike nuk janë pajtuar që zgjedhjet të mos mbahen më 17 tetor, por që kanë rënë dakord që fushata zgjedhore të shkurtohet nga 30 ditë në pesë ditë./GazetaSinjali/