Nënkryetari i Lëvizjes Vetëvendosje, Besnik Bislimi ka paralajmëruar se do të mbahen përgjegjës të gjithë ata që e keqpërdorin politikisht tranzicionin qeverisës.

Përmes një statusi në facebook, Bislimi ka bërë të ditur se në qeverisjen Vetëvendosjes do të zhbëhen të gjitha emërimet dhe avancimet e bëra së fundi nëpër ministri, ndërmarrje publike e agjenci që financohen nga buxheti i shtetit.  

“Ndërmarrjet publike si Telekomi po punojnë me të madhe në rehatime përmes koeficientëve të miqve të establishmentit politik, me shpresë që kështu jo vetëm do të mund të garantohet mirëqenia e zyrtarëve jokompetentë por lojal, por edhe do të sabotohen reformat e qeverisë së re. Njoftojmë publikisht menaxhmentin e këtyre ndërmarrjeve publike, që secila ndërhyrje në emërime, ristrukturime dhe ndryshim koeficientësh gjatë kësaj periudhe do të anulohet menjëherë sapo të fillojë punën qeverisja e re, kurse menaxhmenti bashkë me bordet mbikëqyrëse që kanë aprovuar apo toleruar këto manipulime do të mbahen përgjegjëse”, ka thënë Bislimi.

Nënkryetari i Vetëvendosjes shton se institucionet me rëndësi të veçantë si psh. Doganat e Kosovës, por edhe shumë agjenci e ministri tjera, njoftohen që secili konkurs i tyre, “ristrukturim politik” apo emërim, do të anulohet menjëherë pasi të fillon punën qeverisja e re, kurse personat që janë bërë pjesë e këtyre manipulimeve do të thirren në përgjegjësi.

“Zyrtarët publikë dhe të punësuarit në ndërmarrje publike e agjencitë e pavaruara udhëzohen të mos aplikojnë nëpër këto konkurse fiktive, kurse ata politikanë që po mendojnë se në këtë mënyrë e pamundësojnë punën e qeverisë së re dhe e sabotojnë të njejtën këshillohen të mos bëjnë mund kot, sepse frymën e ndryshimit s’do mund e ndalin asesi”, ka theksuar Bislimi.

Ai ka shtuar se në konferencën e parë për media pas dorëheqjes së Qeverisë Haradinaj kishin kërkuar që periudha e tranzicionit drejt qeverisë së re të mos keqpërdoret politikisht për të vazhduar implementim të çfarëdo programi të saj qeverisës, të mos avancojë me asnjë vendim në çështje të rëndësisë së lartë siç janë ato të lidhura me Trepçën, Telekomin dhe ndërmarrjet tjera publike, Kosovën e Re, Autostradat, Homologimin apo Z-Mobile, dialogun, draftimin e buxhetit, emërimet politike dhe diplomatike, keqpërdorimi politik i aseteve publike e të ngjashme.

Bislimi ka theksuar se ajo që ka ndodhur në terren ka qenë e kundërta e asaj që pritet nga një qeverisje në dorëheqje me minimumin e përgjegjësisë.

“Ndërmarrjet publike e Ministritë e ndryshme, përmes konkurseve fiktive kanë bërë premtime të pambuluara për punësime me të vetmin synim “blerjen” apo korruptimin e mbështetjes politike”, ka theksuar nënkryetari i Vetëvendosjes. /Gazeta Sinjali/