Papa Françesku tha se prindërit e fëmijëve homoseksualë nuk duhet t’i dënojnë ata, por t’u ofrojnë përkrahje.
Ai këto fjalë i tha në fjalimin javor, duke iu referuar vështirësive me të cilat përballen prindërit gjatë rritjes së fëmijëve, shkruan Reuters.
Sipas Papa Françeskut, në këto probleme përfshihen “prindërit që shohin orientime tjera seksuale te fëmijët e tyre dhe si ta trajtojnë këtë, si t’i shoqërojnë fëmijët e tyre dhe jo të fshihen pas një qëndrimi dënues”.
Ai më parë ka thënë se homoseksualët kanë të drejtë që të jenë të pranuar nga familjet e tyre si fëmijë dhe si vëllezër a motra.
Papa gjithashtu tha se përderisa Kisha nuk mund ta pranojë martesën mes dy personave të gjinisë së njëjtë, ajo mund t’i përkrahë ligjet për bashkim civil me qëllim që partnerëve homoseksualë t’u jepen të drejta të përbashkëta në fushat e pensionit, kujdesit shëndetësor dhe çështjeve të trashëgimisë.
Vitin e kaluar, një zyrë e doktrinës e Vatikanit lëshoi një dokument në të cilin thuhej se priftërinjtë katolikë nuk mund t’i bekojnë martesat e gjinisë së njëjtë.
