Kryetari i Aleancës Kosova e Re, Behgjet Pacolli ka treguar një rast që sipas tij i ka ndodhur një mërgimtari sot në pikën e kalimit kufitar në Merdar, ku pas keqtrajtimit atij iu kërkua edhe ryshfet.
Pacolli thotë se kosovari me inicialet E.E, i cili është shtetas zviceran, po vinte në Kosovë për varrimin e një familjari, por pa ndonjë arsye u ndalua nga policia serbe.
Pasi i njëjti refuzoi t’i paguante, sipas Pacollit u mbajt për rreth 45 minuta, teksa tentuan t’i konfiskojnë edhe ilaçet që i përdor çdo ditë.
“Qytetarët e Kosovës çdo ditë po i nënshtrohen ndalesave, keqtrajtimit dhe grabitjeve të pajustifikuara nga policët serbë në pikat kufitare. Shembulli më i fundit ka ndodhur sot në vendkalimin Merdar, ku një kosovar EE ( shtetas zviceran) qe po udhëtonte për në Kosovë, për një varrim familjar u ndalua për një kohë të gjatë, pa ndonjë arsye. Atij iu kërkua ryshfet. Për shkak të rrefuzimit për të paguar, ai u mbajt mbi 45 min, madje tentuan t’i konfiskojnë edhe ilaçet që i përdor cdo ditë ( duke i’a perplas ato per toke). Çfar primitivizmi, çfar kulture”, tha ai.
Pacolli shtoi se autoritetet ndërkombëtare duhet t’i dënojnë këto raste të keqtrajtimeve skandaloze të udhëtarëve nga policia serbe.
