Mërgimtarët e shumtë të cilët erdhën në vendlindje për t’i kaluar pushimet dimërore, tashmë veçse po kthehen në vendet e Evropës. Numri i lartë i atyre që kanë udhëtuar me vetura, si çdo vit, edhe këtë vit ishte i lartë, e që rrjedhimisht janë shkaktuar kolona të gjata në pikat kufitare, deri në 8 orë pritje, raporton Gazeta Sinjali.
Kolonat e gjata po janë stresuese e të papërballueshme për disa nga shoferët. Pas rrahjes së para dy ditëve mes disa mërgimtarëve me Policinë e Kosovës, mbrëmë pjesëtarët e PK-së u përballen edhe me një tjetër incident në këtë pikë kufitare.
Një shtetas shqiptar i Shqipërisë ra në prangat e Policisë së Kosovës, pasi i njëjti dyshohet se shkeli rregullat e trafikut.
Në pamjet ekskluzive të siguruara nga Gazeta Sinjali, shtetasi shqiptar para se të arrestohet dëgjohet duke debatuar me Policinë, teksa ndër tjera i drejtohet njërit pjesëtar duke i thënë “Mos m’prek mo me dorë të thash. Ti s’ke të drejtë me kontrollu makinën time. Kujdes dorën po të them. Kështu jeni ju”.
Në pamje gjithashtu dëgjohen edhe disa udhëtarë tjerë duke u ankuar për pritjet e gjata.
