Sami Lushtaku e ka pranuar fajësinë për kanosjen e avokatit, Gazmend Halilaj, ndërkaq kushëriri i tij, Ibrahim Lushtaku, si dhe Xhelal Zeqiri e kanë pranuar fajësinë për armëmbajtje pa leje, raporton Gazeta Sinjali.

Ndërkaq, dy të fundit janë deklaruar të pafajshëm për veprën “vrasje e rëndë e mbetur në tentativë”, për të cilën akuzohen.

Sipas aktakuzës, Sami Lushtaku po akuzohet për veprën penale “kanosje”, kurse Ibrahim Lushtaku dhe Xhelal Zeqiri po akuzohen për “vrasje të rëndë të mbetur në tentativë”. Po ashtu, këta të fundit po akuzohen edhe për “armëmbajtje pa leje”, ndërsa Ibrahim Lushtaku edhe për “asgjësim apo dëmtim të pasurisë”.

Sami Lushtaku po akuzohet se, pas një shkrimi të të dëmtuarit Gazmend Halilaj, në rrjetin social “Facebook”, të datës 11 prill 2020, në të cilin pretendohej se Sami Lushtaku qëndron prapa keqpërdorimit të 1.4 milion markave gjatë kohës së luftës, ky i fundit e kishte thirrur në telefon Halilajn dhe i ka kërkuar që t’i heqë ato shkrime duke e sharë, fyer dhe me qëllim të frikësimit e kishte kërcënuar me fjalët “ku je se pa ardhë me të kallë nuk kam me lanë”, me ç’rast tek i dëmtuari ka shkaktuar frikë dhe ankth.

Me këtë, Sami Lushtaku po akuzohet se ka kryer veprën penale “Kanosje” nga neni 181 parë të Kodit Penal, për të cilën edhe e pranoi fajësinë në seancën fillestare të mbajtur sot.

Dënimi i paraparë për këtë vepër penale është me gjobë ose me burgim deri në një vit.

Sipas aktakuzës, pasi që avokati Gazmend Halilaj kishte bërë një shkrim në rrjetin social “Facebook”, më 11 prill 2020, kundër Sami Lushtakut, kushëriri i këtij të fundit, Ibrahim Lushtaku, me qëllim të hakmarrjes dhe në bashkëkryerje edhe me të akuzuarin Zeqiri, më 14 prill 2020, ia kishin zënë pritën Halilajt.

Me të parë Halilajn, vazhdon aktakuza, i akuzuari Ibrahim Lushtaku me dashje që ta privojë nga jeta e ka goditur fuqishëm veturën e të dëmtuarit Halilaj, ashtu që në këtë moment, Halilaj kishte dalë nga vetura dhe kishte filluar të ikë. Sipas aktakuzës, edhe të akuzuarit Lushtaku dhe Zeqiri kishin dalë pastaj nga vetura dhe kishin shtënë me armë në drejtim të Halilajt, por nuk kishin arritur ta qëllonin.

Për këto veprime, Ibrahim Lushtaku dhe Xhelal Zeqiri akuzohen nga prokuroria se kanë kryer veprën penale “vrasjes së rëndë të mbetur në tentativë”.

Për shkak se i kishte shkaktuar dëme në vlerë prej 2,700 euro veturës së të dëmtuarit Halilaj, Ibrahim Lushtaku akuzohet nga prokuroria edhe për veprën penale të asgjësimit apo dëmtimit të pasurisë.

Po ashtu, Ibrahim Lushtaku dhe Xhelal Zeqiri akuzohen edhe se në kundërshtim me ligjin për armët kanë mbajtur armë pa leje. Lushtaku akuzohet se ka mbajtur pa leje një revole të tipit “Ekol”, kurse Zeqiri një armë të tipit “Cervena Zastava”.

Me këtë, të dy këta akuzohen për veprën penale “Mbajtja në pronësi, kontroll ose posedim të paautorizuar të armëve”./Gazeta Sinjali/