Presidentja e Kosovës, Vjosa Osmani, është takuar me presidenten e Parlamentit Evropian, Roberta Metsola në Bruksel.
Temë diskutimi mes tyre ishte edhe çështja e liberalizimit të vizave, për të cilën ka shpresë se mund të ketë rezultat pozitiv, në samitin e nesërm që do të mbahet mes BE-së dhe Ballkanit Perëndimor.
“Parlamenti Evropian ka shprehur qartë dhe në mënyrë të vazhdueshme vullnetin e popujve të BE-së për t’i hapur rrugë liberalizimit të vizave për qytetarët e Republikës së Kosovës, si dhe nevojën e përshpejtimit të perspektivës sonë evropiane”, ka thënë Osmani.
Osmani tha se me Metsolan pati një diskutim të hapur dhe përmbajtjesor për vizat.
“Diskutuam për nevojën që liderët e vendeve anëtare ta reflektojnë vullnetin e Parlamentit, si dhe të jepet sinjal i qartë se vendet demokratike, liridashëse dhe të përkushtuara ndaj vlerave evropiane e kanë vendin në BE”.
Osmani do ta përfaqësojë Kosovën në takimin e krerëve të Bashkimit Europian me liderët e Ballkanit Perëndimor.
