Organizata Botërore e Shëndetësisë thotë se varianti Omicron i COVID-19 është zbuluar në 89 vende dhe po përhapet me shpejtësi edhe në vende me nivele të larta të imunizimit të popullsisë.
Tutje OBSH deklaroi se rastet e Omicron nuk transmetohen vetëm nga njerëz që janë infektuar jashtë vendit.
Agjencia e shëndetësisë e Kombeve të Bashkuara tha se “përparësia e konsiderueshme e rritjes” e Omicron ndaj variantit Delta do të thotë se së shpejti ka të ngjarë të kapërcejë Deltan si variantin dominues në ato vende.
Mbetet e paqartë nëse rritja e shpejtë e rasteve të Omicron është për shkak se varianti shmang imunitetin ekzistues, është në thelb më i transmetueshëm se variantet e mëparshme, ose një kombinim i të dyjave.
Pyetje të tjera kryesore rreth Omicron mbeten pa përgjigje, duke përfshirë sa efektive mund të jetë secila prej vaksinave ekzistuese kundër COVID-19 ndaj tij, shkruan Euronews.
Kombet në të gjithë Evropën po lëvizin duke rivendosur masa më të ashpra për të frenuar një valë të re infeksionesh të nxitura nga Omicron, duke shkaktuar thirrje të protestave nga Parisi në Barcelonë.
Ndërsa numri i rasteve u përshkallëzua, Franca dhe Austria shtrënguan kufizimet e udhëtimit, ndërsa Parisi anuloi fishekzjarrët e Vitit të Ri.
Vende të tjera që kanë vendosur masa të reja për shkak të Omicron përfshijnë Danimarkën, e cila mbylli vendet publike si teatrot dhe sallat e koncerteve, dhe Irlandën, ku baret mund të punojnë vetëm deri në orën 20:00.
OBSH e etiketoi për herë të parë Omicron një variant shqetësuse më 26 nëntor.
