Tirana do të presë Samitin për Paqe të Evropës Juglindore me temë “Paqja, Siguria dhe Zhvillimi Njerëzor në Evropën Juglindore”, i cili do të mbahet nga sot deri më 27 tetor.

Samiti që mbahet nën përkujdesjen e kryeministrit të Shqipërisë, Edi Rama, organizohet nga Federata e Paqes Universale (FPU), si pjesë e një serie samitesh anembanë botës që mbështesin ndërvarësinë, begatinë e ndërsjellët dhe vlerat universale.

Samiti do të përfshijë nisjen në Evropë dhe Lindjen e Mesme të Këshillit të Lartë Ndërkombëtar për Paqe (KLNP), një shoqate globale e krerëve aktualë dhe të mëparshëm të shteteve dhe qeverive të përkushtuar ndaj dialogut dhe bashkëpunimit për hir të paqes dhe zhvillimit njerëzor.

Veç kësaj, samiti do të përmbajë asambletë e “Shoqatës Ndërkombëtare të Parlamentarëve për Paqe dhe Shoqatës Ndërfetare për Paqe dhe Zhvillim”.

Federata e Paqes Universale ka qenë aktive në Shqipëri që në vitin 2005, kur u inaugurua prej Themeluesve të saj si pjesë e turneut të tyre botëror. Organizata ka zhvilluar shumë programe për paqebërjen në Shqipëri, Kosovë dhe në Rajonin e Ballkanit duke përfshirë parlamentarë, udhëheqës fetarë, gra udhëheqëse dhe të rinj.

Së fundi FPU ka organizuar Këshilla Paqeje në 61 bashki në Shqipëri, me Ambasadorë për Paqe nga prejardhje të shumëllojshme politike, religjioze dhe profesionale.

Samiti i Paqes i Evropës Juglindore do sjellë së bashku udhëheqës botërorë, përvoja, urtësia dhe thellësia individuale dhe kolektive e të cilëve janë të nevojshme nëse duam të ndërtojmë një botë mirëkuptimi të ndërsjellët, paqeje të qëndrueshme dhe begatie për të gjithë./Gazeta Sinjali/