Situata me koronavirus në Kosovë vazhdon të jetë e rëndë, edhe pse ditëve të fundit ka pasur një rënie të lehtë të infeksioneve, megjithatë shifrat e të vdekurve vazhdojnë të jetë shqetësuese.

Që nga fillimi i pandemisë e deri më sot në vendin tonë janë konfirmuar gjithsej 14 mijë e 119 raste me koronavirus, prej tyre 10 mijë e 546 janë shëruar, ndërsa 563 nuk kanë arritur ta fitojnë betejën me COVID-19. 3 mijë e 10 persona ende e kanë aktiv virusin.

Ministria e Shëndetësisë ka publikuar një fotografi rreth ngarkesës në Qendrën Klinike Universitare të Kosovës dhe në spitalet rajonale nga rastet me COVID-19.

Në 28 ditët e fundit, numri më i madh i të shtrirëve në QKUK dhe spitalet rajonale ka qenë më 10 gusht.

Në këtë ditë, 654 pacientë kanë qenë duke u trajtuar për koronavirus, ku 467 prej tyre kanë qenë të konfirmuar pozitivë me këtë virus.

Numri i pacientëve që po trajtohen për koronavirus në QKUK dhe në gjashtë spitale rajonale ka pësuar rënie ditëve të fundit.

Sipas statistikave të fundit nga MSH, aktualisht janë të hospitalizuar 375 pacientë, prej tyre 277 janë të konfirmuar me COVID-19./Gazeta Sinjali/