Për aksidentin tragjik që ka ndodhur dje në Bullgari, janë ndarë 1 milion e 200 mijë denarë për familjet e viktimave nga Komuna e Çairit, shkruan Gazeta Sinjali.

Kryetari i Komunës, Visar Ganiu, ka propozuar që mjetet e caktuara për festat e fundvitit tu ndahen familjarëve që humbën të afërmit.

Sipas Ganiut 16 viktima janë zyrtarisht banor të Komunës së Çairit.

Këshilltarët e Aleancës dhe Alternativës, thanë se e mbështesin propozimin e Komunës për ndarjen e mjeteve dhe kërkuan që ndihma të jetë më e madhe.

Por kryetari i Çairit, Ganiu tha se tani veprojnë sipas mundësive ligjore, ndërsa në ditët në vijim do të ketë edhe ndihma të tjera, për çka janë angazhuar shumë qytetarë.

Edhe kryetari i Komunës së Gazi Babës, Boban Stefkovski, sot ka dorëzuar propozim-vendim për dhënien e ndihmës financiare për familjet e viktimave të aksidentit të trafikut që ndodhi në Bullgari.

Sipas informacioneve nga komuna, kryetari i komunës ka dorëzuar kërkesën për mbajtjen e seancës në Këshillin Komunal.

“Në këto momente të vështira zie në Republikën e Maqedonisë, solidariteti dhe humanizmi duhet të jenë udhërrëfyes për të gjithë ne. Për këtë qëllim, sot në mëngjes i kam dorëzuar një kërkesë kryetares së Këshillit të Komunës së Gazi Babës, Diana Ilievska, që të mbahet seanca e Këshillit, në të cilën propozoj vendim për dhënien e ndihmës financiare për familjet e viktimave të aksidenteve të trafikut në Bullgari”, tha kryetari Stefkovski. /Alsat/

Gazi Baba me këtë vendim do t’i bashkohet aksionit humanitar të organizuar nga Kryqi i Kuq për ndihmë financiare për familjet e viktimave. /GazetaSinjali/