Sevdail Rrustemi është mërgimtari nga Podujeva i cili humbi jetën në aksidentin tragjik që ndodhi mëngjesin e djeshëm, në Slavonski Brod të Kroacisë, raporton Gazeta Sinjali.

Rrustemi që është njëri nga dhjetë viktimat këtij aksidenti, ishte duke udhëtuar me të njëjtin autobus bashkë me gruan, dy djemtë e tij dhe mbi 60 mërgimtarë të tjerë.

Miku i tij, Fatmir Halimi, përmes një postimi në Facebook ka bërë të ditur se motra e tij bashkë me dy djemtë dhe bashkëshortin e saj, gjendeshin në autobusin që u aksidentua, por ky i fundi nuk arriti t’u mbijetojë plagëve.

“Tragjedia e djeshme në Kroaci e mërgimtarëve tanë, duke ardhur në atdhe kaploi tërë Kosovën, por edhe familjet tona, pasi që në atë autobus gjendej motra ime me dy djemtë dhe burrin e saj, Sevdailin.”

“Pasi motra dhe dy djemtë e saj shpëtuan, plagëve nuk i mbijetoi dhëndri ynë, Sevdail Rrustemi, ku lajmi per vdekjen e tij u konfirmua mbrëmë vonë. Dhëndër, Zoti të mëshiroftë e shpirti yt le të pushojë i qetë në botën e amshuar”, shkroi ai në Facebook./Gazeta Sinjali/