Një ngjarje tejet e pakëndshme dhe mizore ka ndodhur sot në fshatin Bual në Përmet të Shqipërisë. Një shqiponjë mali është masakruar e gjallë, duke ia prerë kyçet e këmbëve e duke ia lidhur krahët për disa tela të një gardhi.
Nuk dihen ende rrethanat apo autorët e kësaj mizorie, por në videon e publikuar nga faqja e qytetit “Bashkësia Përmet” shihet shpendi i ‘kryqëzuar’ i gjallë në një gardh, në rrugët e fshatit.
“Suela Luarasi, një aktiviste e njohur për mbrojtjen e kafshëve dhe shpendëve sot gjatë vizitës së saj në fshatin Buhal të Përmetit ka gjetur një shqiponjë mali të plagosur e të lidhur për së gjalli. Ky akt kriminal duhet të na turpërojë të gjithëve e u bëjmë thirrje Agjencisë së Zonave të Mbrojtura të hapin telefonat e të reagojnë urgjentisht”, thuhet në njoftimin e tyre.
Por, falë angazhimit të qytetarëve, ndihmës së policisë në Përmet dhe Agjencisë së Zonave të Mbrojtura, shqiponja e malit u shpëtua dhe u morr për një kontroll veterinar. Pas trajtimit mjekësor do të lihet e lirë të fluturojë.
Teksa, ishin të konsiderueshme komentet e qytetarëve të cilët thanë se aktin e tillë e shohin si sulm të qëllimshëm ndaj simbolit të shqiptarëve për të përcjellë një mesazh.
