Luksemburgu pritet të bëhet vendi i parë në botë që ofron transport publik falas për qytetarët. Ky plan është pjesë e përpjekjeve të qeverisë për ta zgjidhur problemin e trafikut shumë të dendur.

Disa qytete kanë marrë masë të ngjashme, por Ministria e Transportit ka thënë se kjo është hera e parë që transporti publik do të ofrohet falas në tërë territorin e vendit.

Luksemburgu ka sipërfaqe rreth pesë herë më të vogël se Kosova.

Transporti publik do të jetë falas nga sot dhe pritet të ndikojë në kursimin e 100 eurove në vit për të gjithë qytetarët, për të reduktuar ngarkesën në trafik.

Kjo pasi veturat private janë më të përdorurat në transportin e Luksemburgut. Autobusët përdoren vetëm nga 32 për qind e personave që udhëtojnë për në punë, ndërsa trenat vetëm 19 për qind. Sa për krahasim, në Paris, 69 për qind e punëtorëve e përdorin transportin publik.

Përjashtim nga oferta për transport publik falas përbëjnë udhëtimet e klasit të parë me trena dhe linjat e autobusëve në orët e vona të natës./Gazeta Sinjali/