Luftimet kanë pushuar për momentin, por nuk ka shenja për një marrëveshje kompromisi, ndërsa çështjet kryesore rreth ngushticës së Hormuzit mbeten të pazgjidhura.
Irani e sheh kontrollin mbi ngushticën e Hormuzit si arritjen më të madhe të luftës dhe duket i vendosur ta mbajë atë, edhe nëse kjo rrezikon të prishë marrëveshjen e armëpushimit.
Sipas ekspertëve, qëndrimi i Teheranit është se administrata Trump po përpiqet ta rikthejë trafikun detar në këtë zonë në nivelin e para-luftës, pa e pranuar rolin dhe ndikimin e ri të Iranit atje.
Irani ka deklaruar se anijet që kalojnë përmes ngushticës mund të përdorin vetëm rrugët detare të përcaktuara prej tij. Raundi i fundit i përleshjeve nisi pasi SHBA-ja u kundërpërgjigj ndaj Iranit, pasi ky i fundit kishte qëlluar ndaj anijeve që nuk kishin respektuar udhëzimet e tij.
Në qendër të konfliktit të ri janë interpretimet e ndryshme për pikën e pestë të Memorandumit të Mirëkuptimit. Kjo pikë thotë se Irani do të “marrë masa për kalimin e sigurt të anijeve tregtare” dhe do të bashkëpunojë me Omanin për “përcaktimin e administrimit të ardhshëm” të ngushticës. Megjithatë, ajo nuk i jep në mënyrë të qartë Iranit autoritet ekskluziv mbi trafikun detar.
“Mesazhi i Teheranit është i qartë: Ngushtica është e hapur, por jo sipas kushteve të SHBA-së”, shkroi Negar Mortazavi, drejtuese e Iran Podcast, në platformën X. “Trump nënshkroi një marrëveshje në letër, por tani po përpiqet ta zgjerojë atë në det. Irani po i rikthehet tekstit të marrëveshjes dhe po tregon se fuqia ushtarake nuk mund të ndryshojë atë që është negociuar.”
Paqartësitë në Memorandumin e Mirëkuptimit mund të kenë ndihmuar fillimisht në ndalimin e luftimeve, sipas Grupit Ndërkombëtar të Krizave. Por ato shumë shpejt u kthyen në problem, pasi të dyja palët filluan ta interpretonin marrëveshjen sipas interesave të tyre.
Për të parandaluar prishjen e procesit të armëpushimit, të dyja palët duhet të ndalojnë përpjekjet për t’ia imponuar njëra-tjetrës interpretimin e tyre të pikës së pestë, të paktën derisa të vazhdojnë negociatat, vlerësojnë ekspertët. Kjo do të kërkonte që Irani të ndalojë sulmet ndaj anijeve dhe SHBA-ja të mos insistojë për rrugë alternative, të paktën për momentin.
Ndërmjetësuesit thonë se po përpiqen t’i rikthejnë të dyja palët në tryezën e negociatave. Deri tani nuk ka pasur shenja për kompromis, por armët duket se janë heshtur – të paktën për sot, shkruan CNN.
Sinjali – aty ku e vërteta flet para lajmit!
